«Къаман хозал» яхача фестивале белгалбаьлар вай «Беркат» ансамбла доакъашхой
«Къаман хозал» яхача Халкъашта юкъерча тайп-тайпарча оагӏонех йолча фестивале дакъа лоацаш хилар вай мехкарча «Беркат» ансамбла доакъашхой. Шолжа-Гӏалий тӏа дӏахьош хиннача фестивале бахараш бар Галашкарча культуран Цӏен ансамбла доакъашхой.
Геттара дукха адам гулденна хиннача фестивале массане терко тӏаозаш хилар культуран Цӏен хьалха латтача Гӏулой Саце кулгал деш йола «Беркат» ансамбль. Хореограф волча Колой Ахьмада, фатанча Хьулахой Акромата ӏомабаьраша лакха говзал, начӏал гойтар дуккханешта юкъе.
Вай мехкахоша цига хьекхар ши халхар – «Мехкарий халхар», «Кӏудалцара халхар». Гуш дар, ансамбла доакъашхой цу гӏулакха дикка кийчо яь болга.
Кхелахоша лакха мах оттабеш, дӏагойтар «Беркато» ший гӏулакх. Хьалхара моттиг белгалъеш дола лоархӏаме Диплом делар «Берката».
Цо хьагойт, вай мехкара кхоллама оагӏонцара болх боаггӏача боараме дӏахьош болга, республике начӏал дола къонабараш дуккха хилар.
