«Яндаре» яхача ансамбла дика толам баьккхар, къаман тӏабувхабеча гӏирса фестивале
Гӏалгӏайчен Магӏалбика кхален Юкъерча Ачалкхе дӏадихьар хозален, ӏадатий сийрда цӏай - «Халкъа доттагӏала» къаман тӏабувхабеча гӏирса фестиваль. Из кхетаче дӏайихьар №15 йолча ишкола даькъ тӏа, из хетаяь яр Россе халкъа цхьоагӏон Шу хилара, цига гулбелар дикагӏа бола республикан кхоллама викалаш. Цар сийрдагӏа йола программа оагӏув гойтар гулбеннарашта. Из яр «Яндаре» яхача цу юртарча культуран Цӏен берий халхара ансамбль. Начӏал долча хьехамчас, Гӏалгӏайчен цӏихезача артиста Ӏарчакханаькъан Ахлана кулгал деш, къонача артисташа гойта программа гулбеннарий безам тӏабодаш яр.
«Тха тоабо гойта программа ший маӏан долаш я. Халхарга гӏолла бераш хьежар культуран ӏадаташ лоархӏаме хилар, халкъа барт, цхьоагӏо хилар гойта. Сийрда, дика маха баьккха, хоза тийга Кавказе дахача къамий тӏабувхабу гӏирс безабелар массанена», - аьлар «Сердало» газетага Яндарерча культуран-салоӏама моттига исбахьален кулгалхочо Йовлой Мадинас.
«Яндаре» яха берий халхара ансамбль, из ма дарра дола гӏалгӏай ӏадат гойташ я. Ансамбль сцена тӏа мел йоалача хана наьха дегаш гӏоздоалар. Ӏарчакханаькъан Ахлана кулгал деш йола «Яндаре» яха халхара ансамбль къаман са да ала йиш йолаш я. Цо кхебеш бола артисташ шоай хӏара дегӏа маьженашца, къаьнара вахара ӏадат гойташ хул. Мехкарий халхар а иштта хоза хул, духхьал тайжа йодача гӏургӏажах тара борал долаш.
«Яндаре» яхача ансамбло сердал тел, хозала мотт ший дега гарга хилар гойташ. Халхарча Ӏарчакханаькъан Ахлана бедоаллар, берий халхара дег тӏара дӏоагӏаш да, цо хьалхара шеко йолаш ловзаш бола гӏа, Кавказа сийлен тӏехьале лораеча наькъ тӏа боаккх.
