Мехкарча антимонопольщикаша ИнгГУ студенташца кхетаче дӏайихьар
Мехкарча паччахьалкхен университета студенташца кхетаче дӏахьош хилар тахан УФАСа болхлой, цар доазон тӏа хилар из вӏашагӏкхетар.
«Цу оагӏонца къахьегарий болх ма барра бовзийташ йола экскурси дӏайихьар къонабарашца. Кхоана юристаш, экономисташ хинна дӏаотта безача студенташта шоай балхацарча керттердарех дувцаш ха яьккхар УФАСа къахьегамхоша. Болх боаггӏача боараме дӏабахьара тӏехьа, кхоачашде дезараш дайзар студенташта.
Къаьстта терко еш дийцар вахаре лоархӏамедарашта оттабеча маьхага хьажарах, доккхий гӏулакхаш, базараш лелаеча лораде дезарех, иштта цу оагӏонцарча кхыдарех.
Кхоана мехка цхьацца моттигаш хьалийца къахьега болабала безача студенташта дайзар УФАСа болхлоша бахархой латкъара терко мишта ю, иштта республикера йохкара, эцара гӏулакх боаггӏача боараме хилийтара тӏехьа малагӏа тӏахьожам бу», - йоах «Сердалога» бенача хоамо.
Студенташа кхетадир, цу оагӏонца къахьега ловш волча сага малагӏа хӏамаш да тахан шаьрде дезараш, иштта цу балха тӏа хоржаш хилча эггара хьалхагӏа фу теркалду.
