Гӏалгӏайчен ЦТКиКИ артисташа юртарча дешархошта, хьехархошта концерт делар
Гӏалгӏайчен театра, кинон, укх заман тароний Центро бокъонца дола цӏай дир Юкъерча Ачалкхен дешархошта, хьехархошта. Моттигерча культуран Цӏагӏа «Бӏаьстен оаз» яха концерт хилар, цига гулбеннараша хьалйизар йӏовхалах, паргӏатонах еррига зал.
«Кхоллама кхетаче дӏайихьар «Пушкина карта» яхача федеральни программах, цо хьаелл кхувш йоагӏача тӏехьенна культуран керда таронаш.
Концерта программа оттаяьяр, ерригача жанрай оагӏонаш чулоацаш. Дог ураоттадеш йола халкъа ашараш, лирически композицеш, иллеша из программа безаме йир къонача хьажархошта, цар хьехамчашта», - аьлар «Сердало» газетага ЦТКиКИ зарбан болх лелабераша.
Сцена тӏа къамаьл деш бар начӏал дола солисташ, царех хӏаране шоай дега оаз елар зале хиннарашта. Иллеш аьлар Эккажанаькъан Розас, Исраилова Ларисас, Беканаькъан Хаде, Зортанаькъан Гирихана. Сайре тоаеш хилар пандараши зурмаши локхаш хиннараш - Оздой Лейла (гобой), ӏарпенаькъан Хьава (чӏондарг), цар дийнача оазаца хьалйизар зал.
Хьажархоша тӏоараш детташ, дика тӏаийцар хӏара артист. Чӏоагӏача оазо, классически инструменташа ший тайпара хоза, йицлургйоацаш йир из сайре.
