Мужачарча культуран цӏен артисташ, дешара Денца дешархой, студенташ даькъалабувцаш хилар
Тов бетта хьалхарча деношка дог айдале, ший тайпара дегагӏоз йолаш хул кердача наькъ тӏа гӏа боаккхараш, дешара дуне довза ловраш. Из лоархӏаме цӏай дездеш, Мужечарча культуран цӏагӏа дешара шу доладерашта лаьрхӏа бӏарчча совгӏат кийчдир къонабараша.
«Сердалога» цу моттигера бенача хоамах, юртарча №1 йолча ишколан доазан тӏара дӏаболабелар къона артисташ. Дешархой, хьехархой, иштта берий дай, ноаной цу хозача денца даькъалабувцаш концерт делар цар. Чӏоагӏа дог айденна, хозача, кердача гӏирсаца кийчденна, мугӏара дӏаайтта латтар бераш.
Культуран цӏагӏара шоллагӏа йола тоаба Магасе кхаьчар. Гӏалгӏай паччахьалкхен университета сцена тӏа студенташта, хьехархошта хьалхашка шоай говзал гойташ хилар уж. Бокъонца дола цӏай эттад ала йиш яр цига. Дӏаьхача аьхки дешарах салоӏаш хиннараш; тахан боккхача, дукхача хӏамаех бизза хургболча наькъ тӏа гӏа боаккхаш бар.
