Халкъашта юкъерча тхэквондох йолча яхье котваьлар вай мехкахо Яхьяевгӏар Билал
Тхэквондох йолча халкъашта юкъерча WT президента Европан Кубок (G-3) яккхара яхье дикка белгалваьлар вай мехкахо Яхьяевгӏар Билал. «Сердалога» из хоам Минспорта зарбан болх лелабеча Гӏаппархой Аишас бир.
«80 кг дозал дарашта юкъе белгалваьлар вай мехкахо. Дошо майдилг йоаккхача наькъ тӏа Израилере, Туркий мехкара спортсменаш эшабир цо, иштта российски тхэквондистаца къовсавенна котало яьккхар цо», - йоах тхога бенача хоамо. Дукха ха йоацаш G-6 тайпара яхьашка Гран-при къовсача Риме (Итале) хиннача яхьашка белгалваьннавар вай мехкахо. Германе котваларо 30 балл тӏатехар цунна, цу гӏулакхо эггара толашагӏа болча тхэквондисташта юкъевигар из.
«Халкъашта юкъерча яхье иштта дика ше дӏавовзийта аьттув баьнна Билал даькъалавувц тахан! Кхы а дукха толамаш хилда цун вахаре!» - аьлар министерстве.
