Долакха-Юртара боксёраш белгалбаьлар, Наьсарен кхален йийллача яхье
Долакха-Юртарча берий-ондаргий спортивни ишколе ӏомалураш белгалбаьлар Наьсарен кхале дӏахьош хиннача йийллача боксах йолча яхье, яхаш, дийцар «Сердало» газетага спортсмений лаьрххӏача викалаша.
«Яхьаш дӏахьош хиннача шин дийнахьа, тӏоарска кулгахйоаллорга чӏоагӏагӏа бола говзанчаш лархӏа бокъо йоаккхаш хилар 10-14 шераш даьннараш. Йоккха кхетаче дӏайихьар Яндаре. Шоай мел бола низ ураоттабаь, начӏал гойташ хилар Долакха-Юртарча ишкола викалаш, тренера Жандаранаькъан Микаила кулгалца цар яьккхар кхоалагӏа моттиг. Мутаӏаланаькъан Мухьмад-Басира (36 кг), Цӏечой ӏаддал-Рахьима (40 кг), Тутайнаькъан Мухьаммад-Амина (52 кг) шоай тоаба дошо майдилгаш ера», - аьлар хоамо.
Белгалду, яхьаш дӏахьош хилар дувзаденна дар Гӏалгӏай Республике бокс йоаржаяра, иштта кагирхошта юкъе унахцӏена вахар кхайкадара.
