Магаса «Ишкол 21» яьккха 100 совгӏа саг ӏТ даькъ тӏа балха эттав
Гӏалгӏайче ший моттиг чӏоагӏъеш я Россе таьрахьий даькъ тӏа. Магасера «Ишкол-21» дешара проекта хьалхара лоархӏаме чаккхе еш я - 100 совгӏа саг дика балха моттигаш йолаш ва. Республиканнна дика пайда луш йола из проект дӏайолайир Гӏалгӏайчен столице 2024 шера саькура бетта. Кердадарий программироване ишкол хьакхеллар республикан кулгалхочо Келаматанаькъан Махьмуд-Ӏаьлас хьалхадаккхарах, иштта Гуцаранаькъан Микаила «САФМАР» яхача промышленно-рузкъан тоабо, Сбераца цхьана хьаллоацаш.
«Таьрахьашца дегӏаахара Академе даькъ тӏа хьакхеллар укх заман кампус 3,5 кв. м даькъ тӏа гӏата тӏа, 250 балха моттиг, мехка чулоацамга хьежжа дизайн йолаш. Ишкола доакъош, балха моттигаш гӏалгӏай къаман керттерча оамалашка хьежжа цӏераш таьхка да: дикал, эздел, денал, тешам, сатем - цар белгалду таьрахьашца дегӏаахара культуран ӏадаташца бувзам болаш хилар. Таьрахьий дегӏаахара Академи лаьрхӏа я 500 сага, «Ишкол 21» мах боацаш я, кхыча шахьарашкара деша багӏача наха ӏе моттиг я. Республикан кулгалхочо хьаллоацаш, хьалъяьй республике хьалхара ӏT-отель. Кхыча мехкашкара дешаш бола студенташ мах боацаш цига баха йиш йолаш ба», - аьлар «Сердало» газетага Гӏалгӏайчен Паччахьалкхене.
«Ишкол-21» наӏараш йийлла я, шоай профессиональни никъ хувца безам барашта, е программироване даькъ тӏара хьал довза ловрашта.
Из белгалйоалаш я цига деша отташ хилча технически балха говзал йола, лакхара дешар дийша хилара диплом эшаш цахиларах. Из гӏулакх ӏомаде ловш волча сага лаьрхӏа дӏахьош ба дешархой харжара болх а, аттагӏа хургдолча тайпара.
