Вай мехкара тока оагӏув тоае, 262 млн сом лургда
Вай мехкара тока оагӏонцара моттигаш тоае лаьрхӏа 262, 4 млн сом ахча къоастадергда укх шера «Къилбаседа Кавказа Россеташ» яхача моттиго. Дӏадахача 2025-ча шера хинначул 5,1% дукхагӏа хул из.
Тайп-тайпара низаш дола 86,3 км тока оагӏонаш я тоае лерхӏараш. Мехкарча ерригача кхалений моттигашкара 59 км совгӏа тиша тока саьргаш хувцаш болх дӏахьоргба. Царна меттел таханара дикагӏа дола саьргаш (СИП) дохийтаргда эшача лостамех.
Тока моттигашка, цӏаьхха, хатар ийккха хӏама хилча а, кхерам кӏезигагӏа болаш , моллагӏча хаоттамца дикагӏа товш да керда саьргаш. 331 тишбенна бӏоагӏа, 4,6 эзар совгӏа цар тӏара къаьнара «пелаш» хувцаш, къахьегаргда мехка.
Иштта боккха болх дӏабахьа лерхӏ тока новкъа йола гаьнаш, кӏотаргаш, иштта кхыдола дитташ дӏадоахаш. 30-42 гектара тӏара из болх чакхбаккха беза укх шера. 10(6)/0,4 кВ оагӏонца 111 трансформаторни подстанцешка, иштта 51 трансформатор тоаеш къахьегаргда республике.
ӏан хана кийчо еш, 35-110 кВ йолча 25 тока моттиге лоархӏаме болх чакхбаккха беза. Эггара йоккхагӏчарех я «Наьсаре», «Къоастой», «Слепцовск - 35» яха моттигаш.
Иштта хӏара юрташкара тока моттигаш лораяра тӏехьа тайп-тайпарча оагӏон болхлошца кхетаченаш дӏахьоргья. Дукхагӏа дола балхаш шоай низаца чакхдоахаш ба тахан тока оагӏонцара болхлой, цу гӏулакхо ахча а кходайт, болх а дикагӏа хул.
