2020 шу дӀадоладелча денз, 29 эзар электронни къахьегама книжка хьадийллар вайцига
ГӏалгӀай Республике гӀолла йолча пенсионни, вахар лорадара РФ Ганза отделене 29 эзар электронни къахьегама книжка (ЭТК) хьадийллар.
«Уж хьалаш юкъедаьлча денз, мехка болх беш вола 29 659 саг кердача кепара къахьегама книжка долаш ва. ЭТК хиларах цар таро я шоай къахьегама хоам бовза.
Каьхата книжка тӀа дар мара дац электронни книжка тӀа: из саг балха мичав, малагӀа болх беш ва, маца балха хьаийцав, дӀаваьккхав, иштта каьхаташ чӀоагӀдеш бола хоам», - аьлар ГӀР СФРо.
2020 шерал тӀехьагӀа болх бе волавенначун электронни книжка хьаделл. Шийна болх лоаттабеш волча сага цӀерагӀа дехар яздарца, сага бокъо я шийна дезача кепара къахьегама книжка харжа. ТӏехьагӀа, болх лоаттабеш волчо цу тӀа доагӀаш дола йоазув ду, тӀаккха дӀалу из ГӏалгӀай Республике гӀолла йолча СФРа даькъ тӏа, из гуш хургдолаш сага доалахьарча лицевой чота тӀа.
«Каьхатачул аттагӀа да электронни книжка леладеш, ше гаьна волаш болх беш волчун. Керттерча цун дикачарех да из а, цу тӀара йоазув а дов йиш йоацаш хилар. Цул совгӀа, ЭТК болх баь шераш тувлде а е харцахьа хилийта а таро яц», - аьлар ГӏалгӀай Республике гӀолла йолча СФР даькъа кулгалхочо Йовлой Зубейрас.
