30 совгӏа ПВЗ я тахан мехкарча почтови моттигашка
Юрташкарча почтай моттигашка таханарча дийнахьа 30 совгӏа оагӏонаш да интернете гӏолла ийеш йола хӏамаш дӏалуш (ПВЗ).Из хоам «Сердалога» бир УФПС зарбан болх лелабераша.
«Вай мехка юрташка дукхагӏа я ПВЗ, шахьарашка-м 20-га кхоачаш мара яц. Наха боккха аьттув луш да из хӏама, къаьстта йоккха йоацача юрташка бахарашта, хӏана аьлча шоаш бахача моттигера эца йиш йоаца моллагӏа хӏама интернете гӏолла хьаяйт царна.
Онлайн моллагӏа хӏама харжа, эца йиш хилар бахархой хьал дикка аттачахьа доаккхаш да», - йоах тхога бенача хоамо. Цӏагӏа эшаш дола доккхий, зӏамига гӏирсаш, барзкъаш, кхыметтел талхаш боаца кхача эца аьттув ба наьха, шоаш бахачара ара ца боалаш.
Цул совгӏа, къаьстта почте гӏолла хьаяйташ йолча хӏаман саготде дезаш хилац; хьа ца кхоачаш юсаргйий-хьог, яхаш.
«Шахьарашта гаьна ядача юрташка бахарашта доккха дика деш болх ба из. Почте болх беш бараш ӏомалуш хиннаб маркетплейса оагӏонашца болх дӏакхахьа, цу гӏулакхаца дувзаденна мел дараш шаьрдеш», - белгалдир Россе почтай «Къилбаседа Кавказа» оагӏонцарча тоабашта кулгал деш волча Плотников Александра.
