Гӏалгӏайчен юрташ дегӏакхувлара, дӏадохийтаргда 341 млн сом
«Юртий доазош дегӏадоаладара паччахьалкхен программанна» чудоагӏаш, Гӏалгӏайченна лургда 341 миллион сом. Керттера ахчан дакъа - 339 миллион сом - федеральни бюджетера да», - аьлар «Сердало» газетага Гӏалгӏай Республикан юртбоахама Министерстве.
Из ахча дӏадахийта лаьрхӏад укх заман дикал йола спортивни майдаш хьалъяра, урамаш тоадара, урамашка, сийлен моттигашка сийрда хилийтара.
«Уж балхаш дергда республикан гаьнарча юрташка бахача наьха вахара хьал тоадара»,-аьлар Гӏалгӏай Республикан юртбоахама, кхачан министра Гаьгенаькъан Мухьмада.
Магӏалбика кхален (Инаркъера, Дола-Коара, Заьзгакъонгий-Юртара, Соагӏапчара) бахархой гӏадбугаш да 3 километр дукхагӏа керда сердал урамаш тӏа чуюллаш; цига хургья спортивни майда, иштта Сийлахь- боккхача Даьймехка тӏема, хатараш лаьттача кхыча моттигашка тӏом беш хиннарашта дегӏа сийленгаш.
Наьсарен кхале (Гӏаьзе-Коа, Пхьилекъонгий-Юрта, Буро кӏалха) керттера лерхӏарех хургья инженерни оагӏув: уж да 920 метр йола догӏан хиш даухаргдолаш деш дола гӏирсаш, 1,5 км сердал. Цул совгӏа, хьалъергья шиъ спортивни майда.
Жӏайрахьа кхале (Бейне) хьалъе лаьрхӏад спортивни оагӏон майда, цигара хьаст тоабергба, иштта Жижа-Хьаст оалача хин гонахьара моттиг а хозъергья.
Юртий доазонаш тоадара дӏабахьа лерхӏача балхо таро лургья уж хозагӏа, сийрдагӏа хилийта.
