5,4 эзар совгӏа Гӏалгӏайчен лоIамхочо 400 гаргга кхетаче яьй
Гӏалгӏайчен кагирхой доккхий толамаш доахаш ба шоай лоIамагIа новкъостал дара даькъ тӏа, карарча шера цу проекта юкъеваьлар 5 436 саг.
Тароний керттерча моттигаца цхьана цар 400 кхетаче дӏайихьар. Уж ба массанахьа дакъа лоацаш, мехкахой фусамашка санна, йоккха кхетаченаш еча а новкъостал лоаттадеш. Къаьстта уж белгалбаьлар доазонаш тоадара тӏехьа кхадж тоссача хана. Цар новкъостал дир бахархошта шоашта дезар мишта къоастаде деза хьалхадоаккхаш, цо таро елар Россе хьалхарча моттигашта юкъе цхьа дакъа хьалоацаш, 64 356 сагага кхадж тассийта.
«Гӏончаша цу балха тӏехьа дӏадихьараш дерригаш а 118 сахьат да. Са вай кагирхошца тайп-тайпарча моттигашка вӏашагӏкхетараш хул. Сона гуш да уж дакъа лоацаш хиларал совгӏа, шоашкара пайда юкъебахьаш хила ловш болга. Карарча шера Гӏалгӏайче котъяьлар «Кагирхошта лаьрхӏа бола мохк» яхача яхье, цун 200 млн сом гаргга федеральни оагӏорахьара новкъостал дир. Тахан гӏончий тоабах хьакхийтар ӏаьдала болхлой, ишколаш, паччахьалкхен урхалленаш, НКО, юкъарлон моттигаш.
Со хеташ ва; доакъашхой тоаба кхы а дукхагӏа яржаргья, аьнна. Дӏахо дӏахьош ба # ВАЙ ЦХЬАНА яхача оагӏон чубоагӏа болх. Карарча шера 132 дехар чуделар, йиъ проект котъяьлар. Баркал цига шоашкара дакъа юкъедахьаш мел волча сага. Уж кхы а дукхагӏа хилча бакъахьа ба», - язду ший телеграм-оагIон тIа Гӏалгӏайчен кулгалхочо Келаматанаькъан Махьмуд-ӏаьлас.
Лоӏамхой тоаба ди тӏехьагӏа совйоалаш хиларо хьагойт, мехкарча бахархой юкъарлон институташ дика дегӏайоагӏаш хилар. Республикан кулгалхоша массайолча оагӏорахьара новкъостал лоаттадергда Тароний керттерча моттига, иштта хьаллоацаргья кхувш йоагӏача тӏехьен вахарца ювзаенна уйлаш.
