ГӏалгӀайчера 60 тонн совгӏа гуманитарни мухь бохьийтаргба СВО
Беза Рамадан бутт болаш, республикан Ӏаьдало аргӀанара гуманитарни мухь бахьийта кийчбаьб Даьхе лораеш латтача вай бӀухошта, яхаш, дийцар «Сердало» газетага ГӏалгӀай Республикан Кулгалхочун зарбан болх лелабераша.
«Цу безача Рамадан бетта тхо кийча да СВО даькъ тӀа болча бӀухошта гуманитарни мухь бахьийта. Цунна чудоагӀа кхачан даараш, молаш дола цӀена хий, генератораш, технически гӏирсаш, цӀено лелаяра эшараш, иштта кхы дуккхадар. Гуманитарни мухь бахьийта кийчбара бахьан да беза Рамадан бутт дӏаболабалар, Даьхен бӀухочун Ди хилар. 60 тонн совгӀа мухь кийчбаь баргба Ӏаьдало дакъа лоацаш, вай бӀухой дехарашка хьежжа»,- аьлар ГӀР кулгалхочо Келаматанаькъан Махьмуд-Ӏаьлас.
Цо белгалдир, уж хьаллацар лоархӀаме хилар, дукхагӀа бола бӀухой тӀема декхар кхоачашдеш а марха кхоабаш а ба. Уж ба шоай фусамашта гаьна, чоалханеча хьалашка. Цудухьа царна мел эшар цу юкъе хилийта хьежар шоаш.
ГӏалгӀайчен Кулгалхочо аьлар, Даьхен бӀухой Ди долаш мухь хьалхара бохьийташ бац. Бӏухошта хоалуш хила беза шоай Даьхенцара бувзам, моллагӀча хана массайолча оагӀорахьара новкъостал хургдолга ховш.
«Оаха кхоачашдергда из лоархӀаме декхар, вай котало яьккха даллалца», - аьлар Макшарипа Махьмуд-Ӏаьлас.
