Вай мехкара Россетий 70 энергетик тайп-тайпарча совгӏаташца белгалвир
Вай мехкара «Къилбаседа Кавказа Россеташ» яхача оагӏонцара 70 энергетик, тайп-тайпара совгӏаташ луш, белгалвир. 2025-ча шера шоай балхацара декхараш дизза кхоачашдеш къахьийгача болхлой цӏераш йоахаш лоархӏаме кхетаче дӏайихьар «Россеташ Къилбаседа Кавказ- Ингушэнерго» яхача филиале. Тока оагӏонца къахьегарий Ден хетаяь яр из кхетаче.
Бехктокхаме, боаггӏача боараме къахьегаш хьавенача 74 болхлочоа совгӏаташ делар энергетикахи ЖКХ оагӏонцарча балхахи йолча Министерствон хьалха латтача Султиганаькъан ӏумара, филиала кулгалхочун декхараш кхоачашдеш волча Котаганаькъан Кимрана, Насарерча мэра Оздой Руслана.
Цу юкъе да Россе энергетиках йолча Министерствогара, ПАО «Россеташ» яхача оагӏонгара баркал оалаш дола каьхаташ, иштта мехка Паччахьалкхенгара, «Ингушэнерго» оагӏонгара, мехкадаьгара, «Россе йӏаьха зама», ПАО «Россеташ Къилбаседа Кавказ» яхача моттигашкара, вай мехкарча цу оагӏонцарча министерствогара лоархӏаме грамоташ. Котаганаькъан Кимрана доккха баркал аьлар тӏехдика шоай декхараш кхоачашдеш лаьттача къахьегамхошта.
«Балхара декхараш боаггӏача боараме кхоачашдара тӏехьа тӏатеӏӏа болх беш хиннача хӏара сага доккха баркал ала лов сона тахан. Шун къахьегамга гӏолла наьха фусамашка сийрда, йӏайха я, хӏаьта из боккха, лоархӏаме болх ба вайна массанена. Дӏахо, цхьана къахьегаш, вай кхоачашде дезараш а кӏезига дац. Иштта хьинаре, бехктокхаме, мехках, бахархоех дог лазаш къахьегаш хуле, тока оагӏонца дувзаденнараш дикка тоалургхиларах теша лов сона», - аьлар цо.
