Эллиной-румий оалача латарах, Россе яхьашка котбаьлар вай мехкахой
«Ади-Ахьмад» яхача клуба доакъашхой котбаьлар эллиной-румий оалача латарах йолча U-23 Россе яхьашка. Цӏихезача тренера Крикуха Юрена хетаяь яр уж яхьаш.
«Укх бетта 26-ча денгара 28-ча денга кхаччалца; Омске шоай говзал, низ дӏахьокхаш хилар вай спортсменаш. 72 кг дозал дарашта юкъе дикка белгалваьлар Бӏарахой Мухьмад. Московски областера Балабекян Аркадий эшавир цо 9:1 йолаш. 82 кг дозал дарел котваьлар ӏарапханаькъан Рамзан. Свердловскера Потураев Кирилл эшаве аьттув баьлар цун (3:1).
Лос-Анджелесе дӏаяхьа лерхӏача эллиной-румий латарах йолча U-23 дунен Чемпиоанате дакъа лаца йиш йолаш ба уж хӏанз», - йоах тхога бенача хоамо.
«Бӏарахой Мухьмада, ӏарапханаькъан Рамзана Омскерча яхьашка котбала аьттув баьлар дикка кийчо яь, къахьийга хиларах. Лакха говзал, начӏал дӏахьокхаш бар цига вай спортсменаш. Дошо майдилгаш яьхача цар аьттув ба дӏахо вай мохк дунен Чемпионате дӏабовзийта. Из никъ а иштта котало йолаш хургболаш, боаггӏача боараме кийчо еш къахьегаргда оаха. Толамашца белгалбаларца даькъалабувц тахан спортсменаш, цар тренераш», - дийцар тха газетага цу оагӏонцарча министерствон хьалха латтача Белхарой Руслана.
Омске дӏайихьача яхьашка дакъа лоацаш хиннача вай спортсменашта гӏо деш хилар мехкарча спортацарча латарах йолча Федераце вице-президент, эллиной-румий оалача латарах йолча Россе кагирхой тоабан тренер вола Манкенаькъан Бек-хан, цӏихеза тренер, цу оагӏонцарча латарах йолча Москверча кагирхой тоабан тренер ӏарапханаькъан ӏалихан.
