Хасавюрте хиннача яхьашка пхи майдилг яьккхар вай спортсменаша
Хасавюрте дӏайихьача «Доттагӏал - Кавказа машар» яхача яхьашка пхи майдилг йоаккхаш, белгалбаьлар вайцигара ший лоӏаме кӏалкхетаргах летараш. Из хоам «Сердалога» бир Минспорта зарбан болх лелабеча Гӏаппархой Аишас.
«Россе цӏихезача тренера, Доттагӏала орден енна хиннача Джамалдинов А.А. 80 шу дизара хетаяьча яхьашка, мехкарча 25 моттигера спортсменаш гулбеннабар. Укх бетта 9-ча денгара 10-ча денга кхаччалца шоай говзал гойташ хилар Селий мехка низах чӏоагӏбенна бола спортсменаш. Вай мехкахочо Оалмазанаькъан Ахьмада дото майдилг яьккхар, хӏаьта Оалмазанаькъан Ӏаддала «дошув» кхаьчар цига.
Гаьгенаькъан Ӏаддал-Малик, Пхьилекъонгий Хьамзат, Боранаькъан Мухьмад-Амин кхоалагӏча лагӏа тӏа эттар. Цул совгӏа, тоабан яхьашка, тренер волча Гаьгенаькъан Рамзана хьалхале лелаеш, вай мехкарча тоабо шоллагӏа моттиг яьккхар», - дийцар тха газетага.
