Хургболча архитекторашта дийцар, бокъонаш лораерий балхах
Хургбола архитектораш, дизайнераш хьоашал баха хилар полицейскеш болча, «Студенчески десант» яхача Ерригроссийски акцена чудоагӀаш. Из хоам «Сердало» газетага бир ГӏалгӀай Республикан бокъонаш лораераша.
«Архитектуран, шахьара гӀишлой, дизайна, искусствон колледже» ЧПОУ Ӏомалуш бола, хургбола архитектораш, дизайнераш тӀаийцар Магас-Шахьаре гӀолла йолча Россе МВД Отделене ПДН инспектора, полице капитана Пхьиленаькъан Хьавас, ГӏалгӀай республике гӀолла йолча МВД УРЛС инспектора, полице лейтенанта Исмейланаькъан Рашида, Магас-Шахьаре гӀолла йолча МВД даькъа Юкъарлон кхела кулгалхочо Гаданаькъан Ӏаьлас», - аьлар хоамо.
Кагирхошца къамаьл деш, Гаданаькъан Беслана Ӏаьлас дийцар, дикача къахьегамах, республикан милиционерашта, полицейскешта карагӏдаьннача а карагӏдоалача дикача гӀулакхех, бахархой вахар паргӀата хилийтара цар дика дакъа дӀалоацаш хиларах. Иштта, МВД къонача хьаьшашта дайзар полице денал долча болхлоша балха тӀа леладу доккхий гӀулакхаш, цар шоай декхар тӀехдика кхоачашдеш хиларах, цига царна бовзийтар, Даьхе лораеш зуламхошта духьалаъэтта бейнараш, цар денал, турпалал.
Кхувш боагӀарий гӀулакха йолча инспектора Пхьиленаькъан Саварбика Хьавас дийцар терроризмах, экстремизмах лоравала везарах, наькъа бокъонаш лораярах, уж ца хилийта паччахьалкхено малагӀа къовсам лоаттабу.
Боккха безам тӀабодаш хьежар къона архитектораш, дизайнераш, полице лейтенанта Исмейланаькъан Темарлана Рашида гойтача балха гӀирсага. Рашида иштта гойтар къовсам лоаттабара дика оагӀонаш, цар новкъосталца маьрша ву моллагӀа вола герз бе дола зуламхо.
Хьаьшаша баркал аьлар полице болхлошта, иштта пайдане йола кхетаче дӀаяхьарах, цар болх даькъалабийцар.
