Гӏалгӏайчера йиъ автомобиль лургья, СВО тӏема гӏулакх леладерашта
Российски телевидене, радиовещане бувзама Гӏалгӏай филиала дакъа лаьцар «Деррига Коталон!» яха гуманитарни доккха новкъостал гулдеча. СВО тӏема декхараш кхоачашдеш болча бӏухошта йиъ автотранспорт елар цига къахьегача тоабо. Техника я техосмотр яь, цунга дӏайода оатхалаш хийца, кхай тӏарча хьалашка лелаяра кийча.
«Кастлуш уж автомобилаш, тӏема, декхараш кхоачашдеча вай бӏухошка дӏакхоачийтаргья. Тешшаме транспорт хилар - из сиха новкъостал лоаттадара йола таро я, керттердар - наьха вахар кӏалхардаккхар. Оаха баркал оал Гӏалгӏайчен РТПЦ тоабанна цу юкъе дакъа лацарах. Цу тайпара хӏара дӏа мел лайза гӏа, вай юкъара Котало гаргайоалаеш ба», - аьлар «Сердало» газетага Халкъа фронта Гӏалгӏай моттигерча даькъа исполкома кулгалхочо Тенканаькъан Башира.
Массайолча оагӏорахьара новкъостал лоаттадаро, бӏухошта дукхагӏа низ чуболийт, царна гу бӏарчча тоабашца Гӏалгӏайчен бахархой юкъара гӏулакх хьаллоацаш хилар. Бӏун, къаман цхьоагӏо хилар керттера да вай Даьхен кхерамзле лораеча.
