Кхолламца дувзаденнараш лоархIачарна, совгIат кийчдеш я ЦТКиКИ
Театра, кинон, кердадарех йолча Магасерча моттиге совгIат кийчдеш ба кхолламца дувзаденнараш лоархIачарна. Саькура бетта 2-ча, 3-ча деношка ТЮЗа сцена тIа «Са низ, са дог-ГIалгIай гIала» яха ашарий-этнически спектакль гойтаргья вай актёраша. Вай къаман Iадаташ, оамалаш, истори чулаьца исбахьален проект я из.
«ЦТКиКИ толашагIа болча актёраша, артисташа чIоагIа къахьийга болх ба из. Вай къаман тхьовра хинна вахар, цу ханара хьоалчагIанца, зоахалол дувцарца, дIа-хьа бовзарца дувзаденнараш довзаргда цига.
Къаман иллеш, халхар, мукъам хургба цига дийна болаш.
Хьакхеллача хьаькъалца вIашагIъеллача гонахьарча моттига а бокъонца къаьнара ханаш гойтаргья наха», - дийцар «Сердалога» цу моттигера.
Из спектакль гойтар керда, боккха болх ба кхоллама болхлошта. ГIалгIай къаман исторецара дуккхадараш бIаргаго аьттув хургба хьажархой.
