Тока леткъа бахархой теркалбир ЦУРе
Ток боаггӏача боараме хьакхоачаш яц, яхаш, леткъаш бола бахархой теркалбир ЦУРе. Уж кхоачамбоацараш малагӏча юрта, шахьаре да тохкаш хилар тахан. Цу юкъе я Илдарха-Гӏала, Дошлакъий-Юрт, Наьсар-Керте, Эбарга-Юрт, Пхьилекъонгий-Юрт, Гӏажарий-Юрт, Йоккха Ачалкхе.
«Къилбаседа Кавказа Россетий- «Ингушэнерго» викалаша тохкама болх дӏахьоргба, цу моттигашка гӏолла. Цига ток боаггӏача боараме цахилара бахьанаш гучадоахаргда, иштта дикка хьожаргба, тока хьал эшадеш йола майнинга фермаш йий цу шахьаре, юрташка», - йоах «Сердалога» бенача хоамо.
Из тайпара хӏама каст-каста нийслуш да шахьарашка, юрташка. Цу оагӏонцарча къахьегамхоша боаггӏаш бола болх дӏахьош тохкаргда из.
ЦУРо бахархошка кхайкарал ду, моллагӏа кхоачамбоацараш нийсделча, ханнахьа хоам бе, яхаш.
