Магӏалбикерча ишколашка шийла хилар зийра ЦУРо
Укх тӏехьарча деношка интернета оагӏонашка гӏолла чӏоагӏа латкъаш ба Магӏалбикера бахархой; ишколашка, берий бешамашка шийла я, яхаш. Мехка доал деча Оагӏон моттигаша теркалдир из гӏулакх. Дешареи ӏилмани гӏулакхех йолча министерстве, из дош айдеш, хоам бир цар.
«Дӏабихьача тохкамах гучадаьлар, Магӏалбикерча №18 йолча гимназе, «Чӏагарг» яхача берий беша шийла хилар бакъдолга. Йӏовхал лоаттаеш дола гӏирсаш дикка тишденна хиларца дувзаденна да из. «СпецстройКлимат» яхача оагӏон болхлой ба карарча хана из хьал тоаде гӏерташ къахьегаш боахкараш. Дала аьннадале, йоккха юкъ ялалехь, боаггӏача боараме йӏовхал хургйолаш меттаоттаде лерхӏ цар из гӏулакх», - дийцар «Сердалога» мехкарча ЦУРе.
Республиканна доал дарах болча Оагӏон болхлой тӏахьожам беш ба цу гӏулакха. Иштта шахьарера бахархой а чӏоагӏа сатувсаш, хьежаш ба; бераша ха йоаккхача моттигера хьал тоадаларга.
