Долакха-Юртарча дешархошта хьалхадаьккхар, терроризма воча хьалах лорабалар
Долакха-Юртарча культуран Цӏагӏа «Терроризм - бокъо йоаца тӏом» яха цӏи йолаш хьехама кхетаче дӏайихьар. Цига дакъа лоацаш хилар юртара администраци, бокъонаш лораяра викалаш. Из кхетаче вӏашагӏъеллаяр моттигерча ишкола дешархошта лаьрхӏа, царна терроризма хьал довзийтара, уж цу ийрчача наькъа духьалъотталуш хилийтара.
«Къамаьл дӏахьош даьржа дийцар терроризма зуламах, цун гӏозарах, цар шоай гӏозара кагирхой юкъебахара малагӏа тийшаболх лелабу, тӏехьагӏа цох хьадоала зулам малагӏа да, мишта цунна духьалъотта веза, малагӏа нийса никъ лелабеш хила веза», - аьлар «Сердало» газетага из дӏахьош хиннача Манкенаькъан Зинас.
Дешархошта хьалхадаьккхар, дукхагӏча даькъе террористаш, шоай гӏозара юкъебаха кийчбераш кагирхой хилар, нагахьа санна кагирхой из дика кхетадеш хилча, царна духьалъотта атта хургдолга. Кхетаче чакхйоалаш, доакъашхоша дийцар берашта терроризм - из духхьал герзацара хьал хинна ца ӏелга. Цул а кхерамегӏа да низ тӏабахьаш, зулама юкъе саг воаккхаш хилар, къаьстта интернете гӏолла из хьал доаржадеш хилар.
Ше цу юкъе нийслургвоацаш дикка уйла е еза сага, массехказа хьажа веза хоам нийса бий, тешам боацача нахаца бувзам лелабе мегаргбац. Лоархӏаме да кхетадеш хилар, кхерамзле - из вайгара хӏаранегара дӏадехаш дола юкъара декхар да.
