Ши майдилг яьккхар гӏалгӏай тхэквондхоша Нальчике Россе Хьалхале дӏахьош
12.06.2026 14:52
Нальчике ВТФ Россе Хьалхале дӏахьош, ши майдилг яьккхар тхэквондох 12-14 шераш даьннарашта юкъе гӏалгӏай спортсменаша, аьлар «Сердало» газетага мехка спорта Министерствон зарбан болх лелабеча Гӏаппархой Аишас.
«Гӏабартой-Балкхарой республике дерригача дозалех чӏоагӏагӏварех хила бокъо яккха гIерташ вар 59 моттигерара 778 спортсмен. Гӏалгӏайчен тоабо говзала лакха боарам гойтар цига. Мержой Ӏаддал-Малика, 41 кг дозал долаш, республиканна дошо совгӏат дера. Овшанаькъан Мухьаммад-Амина шоллагӏа моттиг яьккхар 65 кг кхаччалца дозал дарашта юкъе», - аьлар тхоца къамаьл даьчо.
Белгалду, бераш яхьаш дӏаяхьа кийчо яь хиннилга, царна кулгал дир тренераша Цисканаькъан Ибрахӏима, Къамурзой Хьамзас.
