Кредиташца боккха тийшаболх кхоастабаьраш бехктокхаме озаргба
Боккха тийшаболх кхоастабаь вола ши мехкахо гучаваьлар мехкарча полице болхлошта. Илдарха-Гӏалий тӏарча Тохкама комитета викалаш ба цу гӏулакхаца болх дӏахьораш. РФ УК 3-ча даькъа 159.1 ст. бехктокхаме озаш ба уж, кредиташца тийшаболх кхостабарах.
«Тохкама комитета болхлоша белгалдечох, 2024-ча шера лайчилла, оагӏой бетташка мобильни оагӏонга гӏолла кредит эцаш, дехар чуденнад цар, бакъда шоашта хьатӏадоагӏача ахчанца, бахача моттигаца дувзаденнараш харцахьа оттадаьд. Бӏарчча тийшаболх вӏашагӏбеллаб цар. Кредитни чӏоагӏо оттаяьчул тӏехьагӏа 3 360 000 сом, 2 300 000 сом ахча хьатӏаденад цар банковски чоташ тӏа. Цул тӏехьагӏа мехкарча Арбитражни суде бахаб уж, банкроташ хилар бакъдеш каьхат деза шоашта, аьнна. Банкроташ хиларцара болх бизза чакхбаьккха, ахча шоашта ма тов дехкад цар, кредитни моттига зе даьд 5,6 млн сом», - дийцар «Сердалога» мехкарча Тохкама комитете.
Из гӏулакх ма дарра тохкаш, къахьегаш да тахан ӏаьдал, аттача ахчанца бӏаьхий хила, сакъерда лаьрхӏа хиннараш суда духьала оттаргба. Россе Тохкама комитета мехкарча оагӏон болхлоша бахархошта хьалхадоаккх; банкаш ӏехаеш, хӏилла ювцаш, вӏалла доаца адрес оттадар; ше цӏаккха болх беш ца хиннача моттиге балха ва, аьнна, яздар; доккха ахча хьатӏадоагӏаш ва, аьнна, харцо ювцар; ӏаьдало бехктокхаме озаш зулам долга. Кредиташ доахаш, тӏаккха къийбалара болх чакхбоахаш лелараш ишта атта кӏалхарбаргбац.
