Вайцигара дзюдоист Боканаькъан Ислам Россе Хьалхале къайсача белгалваьлар
02.02.2026 15:40
Гӏалгӏайчен дзюдо ишкола спортсмена кхоалагӏа моттиг яьккхар Россе Хьалхален яхьашка 21 шу даьнначарна юкъе, яхаш, дийцар «Сердало» газетага мехка спорта Министерстве.
«Россе 73 моттигерча спортсменаша толам баккхара тӏехьа къовсам дӏабихьар. Яхьий тӏехьарча дийнахьа Боканаькъан Ислама боарза совгӏат даьккхар. Дика кийчо яь, котало яккха къахьегаш, ший тренера Цӏечой Сулеймана яхачунга ладувгӏаш, хьавоагӏа из», - аьлар спорта юкъарлоно.
Белгалду, хьалха «Сердало» газето яздаьдар, Султиганаькъан Ислама (66 кг), Саккхаланаькъан Микаила (100 кг) Екатеринбурге дӏахьош хиннача Хьалхален юкъе котало яккхарах.
