Илдарха-Гӏалий тӏа тоабаьча урамга хьажа баха хилар единороссаш
Илдарха-Гӏалий тӏара Осканаькъан цӏерах бола урам тоабеш дӏабихьача балхага хьажа арабаьлар «Цаӏ йолча Россе» доакъашхой. Къаман программага, «Шахьарера вахар» яхача федеральни проектага гӏолла дӏахьош болх ба из.
«Дукха машинаш лелаш, урам ба из шахьаре. Осканаькъан цӏерах болча ураме ши ишкол я, цунга хьежжа хӏара дийнахьа дукха бераш, цар даьй, ноаной дӏа-хьа ух цига гӏолла. 290 адрес долаш моттиг я из таханарча дийнахьа. Ишколашта юхе асфальт ӏобиллаб. Из болх боаггӏача боараме чакхбаьккхабий хьажа арабаьннараш раьза хилар, никъ тахан бахархошта паргӏато еш ба», - дийцар «Сердалога» «Цаӏ йолча Россе» партийцаша.
Къаман программага гӏолла кхоачашдеш дола балхаш тӏехдика даь хилар да лоархӏаме, хӏана аьлча моллагӏа куц тоадаь моттиг бахархошта атто еш хила еза. Лораде дезараш теркалдеш, дӏабихьаб цу урамера болх.
