МКЖР экскурсовода дешархошта лаьрхӏа лекци йийшар
«Даьхен сийдола къонгаш» яха лекци дӏайихьар Пхьилекъонгий-Юртарча Пхьилекъонгий Махьмад-Саӏида цӏи лелаеча № 4 йолча ишколе, мехках баьхча наьха Мемориальни моттига экскурсовод йолча Аджинаькъан Мадинас. Гӏалгӏай къаман къонгаш Россе тайп-тайпарча моттигашка моастагӏчун наькъаш тедаш лаьтталга белгалдир цига. Бӏаьшерашкарча доккхача исторе чухьа баха бисача къаман къонгий цӏераш йовзийтар берашта Мадинас.
«Сийлахь-боккха Даьймехка тӏом латтача хана, тӏема аренашка цӏихеза хиннача вай къаман къонгех дийцар кхетаче. Иштта хьоахабир тахан Даьхен хӏама лораде арабаьннараш а. Деналца, майралца моастагӏа духьала лаьттача яхь йолча къаман къонгий цӏераш дегашка массахана яха езилга, тӏехьено тӏехьенга телаш цар истори довза дезилга, белгалдир экскурсовода», - хоам бу «Сердалога» из кхетаче дӏахьош хиннараша.
Белгалде деза, кхувш латтача къонача тӏехьенна иштта йола урокаш лоархӏаме йолга. Даьхенцара безам, лерхӏам боккха хила безилга хьалхадаха деза вай берашта массахана. Берий дукха хаттараш дар, царех хӏарадар дикка доашхаш жоп дала хьежар эксурсовод. Яхь йола, эздий къонгаш даим хилба вай къаман!
