«Даькъастен Россетий» энергетикаша Наьсарен дешархошта хьалхаяьхар цӏагӏара, арара токацарча кхерамзлен бокъонаш
«Даькъастен Россетий» - «Ингушэнергос» урок дӏайихьар Наьсарен-Шахьара №18 йолча ишколе, токацарча кхерамзлен бокъонаш йовзийташ. Интерактивни дешар дӏахьош, ладувгӏаш хилар йиълагӏча классашка вагӏа 25 дешархо.
Энергетикаша берашта хьалхадаьккхар тока гӏирсаш мишта леладе деза, тока моттигашка хоам беш дола хьал малагӏа да, иштта дӏагойтар чоалхане хьал этта моттиг нийсъелча, «гӏажа» гӏа оалача кепара мишта аравала веза цу даькъ тӏара.
Къаьстта йола терко тӏаяхийтар ара ди къувкъача хана фу де деза хьалхадоаккхаш, вӏалла а де йиш йоацар да, тока моттигаш йолча телефонаца сурташ дахар. Говзанчаша берашта йовзийтар «Россети» оалача компане кхетам балара проект. Из го йиш я «ВКонтакте» вахара бувзамашка. Цига Лампочкина Машас гойт, бераш кхетаргдолаш, токах лоравалара никъ.
«Токах бераш лорадар, энергокомпане балха керттера да. Тха говзанчаша каст-каста республикан дешара моттигашка кхетам балара болх дӏахьу. Лоархӏаме да царна чоалхане моттиг нийсъелча де дезар хьалхадаккхар, шоай вахар лорадара ха дезар малагӏа да дӏахьехар», - аьлар «Даькъасте»-«Ингушэнерго» филиала кулгалхочо Котаганаькъан Кимрана.
«Цу тайпара урокаш эшаш я. Бераша, цхьайолча хана, вӏалла уйла яц кхераме хьал нийсдаларах, царна хет шоашта гонахьара тока гӏирсаш ловзоргаш долаш санна. Говзанчаша царца къамаьл даьчул тӏехьагӏа, царна хьалхайоах уж бокъонаш, из дуккха дикагӏа накъадоал. Тхо раьза да энергетикаша тхоай берашца из болх дӏахьош», - аьлар 4 «А» класса кулгалхочо Мургӏастанаькъан Розас.
Токацара хьал лорадара йола урокаш Гӏалгӏайчен кхыча дешара моттигашка а дӏахьоргья, хӏаьта ахкан замах бераша салоӏача хана уж ю лаьрххӏа ишкола даькъ тӏа дӏахьоча лагерашка.
