«Даьхен лорабой» ганзо, Гӏалгӏайчен Росгварде бувзам чӏоагӏбу
Гӏалгӏайчен «Даьхен лорабой» ганза филиала кулгалхочо Абаьданаькъан Ислама вӏашагӏкхетар хилар Росгварде республикан урхаллен кулгалхочун гӏончаца Албетков Андрейца. Цу кхетачене дувца оттадаь керттера дош дар тӏема бӏухошта массайолча оагӏорахьара новкъостал лоаттадар кхы а дикагӏа хургдолаш тоадар. Цар дийцар паччахьалкхенгара луш дола аьттонаш дикагӏа царга дӏакхоачаш хила дезарах, тӏема декхараш кхоачашдеш болча росгвардейцашта, шоай Даьхе бахьан долаш вахар ӏодиллача бӏухой дезалашта из чӏоагӏа эшаш хиларах.
«Кхетаче дӏахьош шинна а оагӏоно ма дарра техкар тӏема ветераний цӏи чӏоагӏъяр, лорашка чакхбалара, меттаоттабара хьал тоадар, санаторно-курорта дарбаш дар, царна доагӏаш дола ахчаш хьаэцара каьхаташца ӏалашо яр, коммунальни хьалех льготаш ялар. Къаьстта терко тӏаяхийтар цар балха оттара хаттара, бейнарий дагалоаттама улг хьаделлара, Даьхенцара безам совбаккхара, республикан кхувш йоагӏача тӏехьенна кхетам балара кхетаченаш цхьана дӏаяхьара», - аьлар «Сердало» газетага «Даьхен лорабой» ганзе.
Филиала кулгалхочо Абаьданаькъан Ислама ма аллара, ганза, республикан Росгварде цхьана болх дӏахьош хиларах, таро хул цу даькъ тӏара хаттараш дикагӏа кхоачашде. Цига хьалхашка нийслуш дола декхараш, мел чоалхане мара цахиларах, сиха кхоачашду; совлен бола каьхаташцара болх юстар а боаккхаш.
