Гӏалгӏайчен «Даьхен лорабой» ганзо новкъостал ду СВО ветеранашта
Карара шу дӏадоладелча денз, «Даьхен лорабой» ганза моттигерча филиало мах боацаш юридически новкъостал дир СВО 50 совгӏа ветерана, бейнача бӏухой дезалашта. Цу тайпара болх дӏахьу, бе-беча моттигаша шоайла бувзам лелабеш. Укх тӏехьарча хана, говзанчаша цхьана бархӏазза нах тӏаийцар прокуратуро, Паччахьалкхен юридически бюрос, иштта Адвокатий, мехка Нотариальни палаташа дакъа лоацаш. Цхьана из болх дӏахьош хиларо таро лу наьха хӏара а дехар сихагӏа тахка, цунна жоп дала.
«Дукхагӏа наьха хаттараш дувзаденна да тӏема ветерана каьхаташ ӏалашдарца, иштта кредита ха тӏехьаяккхар дезараш а нийслу. Цу юкъе да лаьттанца дувзаденна хаттараш.
Бокъонаш лораяра новкъостал дар тха балха керттера да, иштта гӏо ду маьршача вахарга уж сихагӏа баргболаш, цар законах доагӏаш дола хьашташ а кхоачашду», - аьлар тхоца къамаьл деш «Даьхен лорабой ганза викалаша.
Ганзо дӏахо а, каст-каста нах тӏаэцаш, царна массайолча оагӏорахьара юридически новкъостал деш болх дӏахьу, дӏахо а из болх иштта дӏабахьа лаьрхӏад.
