Эккажкъонгий-Юртарча футболисташа котало яьккхар
2010-2011-ча шерашкарча футболистий тоабашта юкъера берий яхь дӏайихьар Нальчике. Цига котало яьккхар «Эккажкъонгий-Юрт» яхача берий футбола тоабо.
«Сердалога» из хоам бир футболах йолча Федераце. «Дикка белгалбаьлар вай футболисташ мехкашта юкъерча яхье. Диъ ловзарашка хьалхале лелаеш хилар уж.
Хьалхарча къовсаме «Спартак» Нальчик эшайир цар 19:0 йолаш. Цул тӏехьагӏа Апшев Азнаура ишкол эшайир цар – 4:0. Нарткалерча «Нарт» яхача тоабанца лайза, 3:0 йолаш котбаьлар вайбараш.
Яхь чакхйоалача хана эшабир цар Нальчикерча «Форста» футболисташ - 3:0», - йоах тхога бенача хоамо. Толашагӏа вола ловзархо ва аьнна белгалвир Майсиганаькъан Амин, хӏаьта Къулбажанаькъан Расул тоабан наӏараш лораяра тӏехьа дикка белгалваьлар.
«Эккажкъонгий-Юрт» яха ДФШ зӏамагӏбарий тоаба шоллагӏча лагӏа тӏа эттар цу къовсаме. Зӏамагӏабарашта юкъе дикка белгалбаьннарех ба Бӏарахой Ахьмад, Ховтанаькъан ӏийса, Баркинхой Мухьаммад. Тоабашта хьалха латта тренераш ба Овшанаькъан Апти, ӏахилганаькъан Муслим.
