Магӏалбика кхален администраце кхетаче дӏайихьар
Магӏалбика кхален администраце кулгалхочо Галай Мусас яьржа кхетаче дӏайихьар, цига техкар вахара бувзмашка гӏолла дола наьха хьашташ. Шахьара тайп-тайпарча гӏулакхаш тӏара викалаш бар цига дакъа лоацаш.
«Цига дийцар, хӏара дош белгалдеш, де лерхӏачох. Галай Мусас белгалдир, хӏара вахархочун хаттар тахка а из кхоачашде а деза аьнна. Цун хоадам беш, бехктокхамеча болхлошта тӏадиллар уж хаттараш кхоачашдар. Керттера терко тӏаяхийтар уж хаттараш шоай ханнахьа, тӏехьа ца тетташ, кхоачашдара. Иштта белгалдир, цхьадола хаттараш - уж нах бахача моттигашка дӏа а ухаш, цар хьал тохкаш, кхоачашде дезаш хилар», - аьлар «Сердало» газетага Магӏалбика шахьара администра,це зарбан болх лелабераша.
Доакъашхоша терко тӏаяхийтар, «Вахара хьалаш» яха къаман проект кхоачашъяра. Цу проекта чуйоагӏаш, кхоъ юкъарлон моттиг хьалъергья. Уж балхаш дӏадоладе лаьрхӏад тушола бетта, цо таро лургья бӏаьсти дикагӏа из болх дӏабахьа, шахьара хьалаш тоаде.
Кхетаче чакхйоалаш, Галай Мусас белгалдир, нахацара къамаьл, цар хаттараш кхоачашдар, Магӏалбика вахаре дика дакъа лоацаш хилар, шахьара керттера декхар да. Цо тӏадиллар, Магӏалбика бахархой вахара хьалаш тоадара лаьрхӏа дола балхаш тӏахьожам болаш леладар.
