Вахара оагӏонцарча гӏулакха болхлой даькъалабийцар вай Мехкадас
Вахара оагӏонцарча гӏулакха болхлой даькъалабувцаш, къамаьл дир вай мехкадас Келаматанаькъан Махьмуд-Ӏаьлас. Из хоам «Сердалога» бир мехкадаь зарбан болх лелабераша.
«Гӏо эшаш, терко езаш, халача хьале этта болча наха новкъостал дар да цар декхар. Из болх лелабеш бола нах ший тайпара кӏаьда дегаш долаш, сабар долаш, хӏара сага хьал кхетаде ховш хила беза. Цу балха тӏа дуккхача шерашка къахьийгарашта, ветеранашта къаьстта доккха баркал кхайкаде лов сона тахан», - аьлар вай Мехкадас.
Республикан кулгалхочо белгалдир, вахара оагӏонца гӏо лоаттадара вай мехка терко елга. Из гуш да дукха бераш долча дезалашта, ха яхача наха, дегӏа могашал эшаеннарашта цхьацца новкъостал деш хиларца.
«Бахархоех дог лазаш, гӏо ийшача хана оагӏув хьаллаца кийча хиларах; шоай декхараш боаггӏача боараме кхоачашдеш, халача хьале барашта атто ярах, баркал хилда шоана!
Вахаре нийслуш йолча халонашта духьалъ-отта гӏо ду оаш тахан наха. Могаш, маьрша долаш, иразе, аьттонца, беркатаца дахалда шо», - йоах Мехкадас ший къамаьла юкъе.
