ГӏалгӀайчен Кулгалхочо могадир Наьсаре дика хьалаш хьакхоллар
ГӏалгӀайчен кулгалхочо Келаматанаькъан Махьмуд-Ӏаьлас дика мах оттабир Наьсаре паргӀатон хьалаш хьакхоллара, тӀехьарча хана сийрдагӀа, хозагӀа хулаш йоагӀа шахьар, яхаш, дийцар «Сердало» газетага мехка Кулгалхочун зарбан болх лелабераша.
«Шахьар ди тӀехьагӀа паргӀатагӀа, салоӀама хьалаш дукхагӀа долаш, дегӀайоагӀаш я; хьаьшашта а бахархошта а деш да из. Из да доал деча даькъ тӀарча администраце, мэре кулгалхочо Оздой Руслана, иштта федеральни программашка дакъа лацарах хьахулаш дар»,-аьлар Макшарипа Махьмуд-Ӏаьлас.
Цо иштта белагалдир, Наьсаре шозза котъяьннаяр шахьара хьалаш тоадара дӀахьош хиннача Ерригроссийски проектий яхьашка. Цо таро елар эггара дукхагӀа нах бахаш йола шахьар тоае федеральни бюджетера ахча хьахьожаде.
Иштта цу юкъе дика дакъа лоац моттигерча бюджето, кхы а тайп-тайпара инвестораш юкъебахарах.
Лакхехьа белгалъяьхача проекташта чуйоагӀаш, Наьсаре хьалъергья дукха салоӀама моттигаш, тоаергья шахьар.
«Из деррига де вӀаштӀехьадоал федеральни центро вай республика хьаллацарах, цо вайна федеральни программаш лоаттаяр бахьан долаш. Вай декхар – цу тайпара хувцамаш Наьсаре даь а ца Ӏеш, ерригача ГӏалгӀайче дар», - аьлар Мехкадас.
