ӏаьлий-Юрта керда дарбанче хьайийллар вай Мехкадас
ӏаьлий-Юрта керда дарбанче хьаеллаш, дикахетар хилар бахархошта. Цига дакъа лоацаш вар мехка кулгалхо Келаматанаькъан Махьмуд-ӏаьла, гӏишлон балхех йолча Министерствонна хьалха латта, цу дерригача гӏулакха тӏахьожам лоаттабаь Иленаькъан Муса.
«Болх сихагӏа йистебаккха хьожаш хиларал лоархӏамегӏа дар тхона, хӏара хӏама боаггӏача боараме, тӏехьагӏа гучадаргдола цхьаккха кхоачамбоацараш доацаш кхоачашдар. Дарбанче къахьега безарашта, унахошта ма хулла паргӏата хургйолаш тоаяь я из моттиг. Юртарча бахархой унахцӏено лораяра тӏехьа баьккха лоархӏаме гӏа ба ала деза цох тахан», - дийцар «Сердалога» министр волча Иленаькъан Мусас.
Белгалде деза, таханарча ханага хьежжа йола дарбанче хьалъяр бахархошта доккха совгӏат долга. Таханарча дийнахьа денз, лора тӏабахар, дегӏа хьал тохкаш чакхбалар, дарба дар, юртара арабовла ца безаш, чакхдаккха аьттув ба цу наьха. Беррига болх лакха тӏахьожам беш, деррига теркалдеш дӏабихьаб.
Кабинеташ йоккха, сийрда я, хьежаш багӏа беза залаш а дегӏа могашал эшаенна, маьженаш лертӏа болх беш йоаца нах теркаме лоацаш тоаяьй, дарбанчен технологически парке таханара дикагӏа дола гӏирсаш латт. Юртарча дарбанче болх бе лакха говзал йола лораш хьаухаргболаш, деррига боаггӏача боараме тоаде, массадолча хӏаман ӏалашло е хьежаб цига.
Унахцӏенон оагӏонца дувзаденнараш меттадоаладара тӏехьа лоархӏаме, боккха болх ба ала деза цох. Цу гӏулакхо хьагойт, шахьарерча, юртарча дарбанчешта юкъе йоккха башхало йоацилга.
