Тӏема аренашка вахар хаьдача СВО бӏухой паччахьалкхен совгӏаташ цар дезалашка дӏаделар вай Мехкадас
Тӏема аренашка шоай декхараш кхоачашдеш латташ, вахар хаьдача бӏухошта доагӏаш дола паччахьалкхен совгӏаташ цар цӏагӏарча нахага дӏакхоачийташ, кхетаче хилар Мехкадаь, Паччахьалкхен Администраце Сийлен зале. Цига дакъа лоацаш вар вай республикан кулгалхо Келаматанаькъан Махьмуд-ӏаьла, ӏаьдала болхлой, командни тоабан доакъашхой, байнача бӏухошта уллув хиннараш. Тахан тӏема операци латтача моттигашка шоашта тӏадаьхка декхараш кхоачашдеча наькъ тӏа байна бӏухой паччахьалкхен совгӏаташца белгалбир, Россе Президента Путин Владимира амарца. Сийлен зале гулбеннабар цар ноаной, истий, бераш, йижарий, вежарий.
«Оаха кхетаду, шугара бала, гӏайгӏа цхьаккха хӏаманца яйлургйоацилга. Даьхен хӏама лораде арабаьннарий цӏераш боккхача мехка исторе массахана йовзаш хургья, вай дегашта цӏаккха а бицлургбац уж нах. Къаьстта йистхила лов сона тахан укх зале долча берашка. Кхоана, кхийна даьнна ураэттача, кхетадергда оаш шоай дай бизза къонахий болаш, шоай декхараш бехктокхаме кхоачашдеш, лакха майрал, денал гойташ лаьтталга. Бӏухой лоархӏаме гаргара нах, шуца шун гӏайгӏа екъаш, таханара шун хьал дика кхетадеш, ла ма могга йола хало шун дегашка латтилга ховш да шоана тхо. Шун къонгаша тӏема аренашка гойтача деналах доаккхал деш хургда тхо массахана!» - аьлар вай Мехкадас, из кхетаче хьаеллаш. РФ Президента Путин Владимира амарца лоархӏамеча паччахьалкхен совгӏаташца – Денала Орденца белгалбир тӏема аренашка вахара никъ хаьда вай къаман къонгаш Кокурхой А., Султиганаькъан М., Цӏечой М., Пхьугӏой М., Овшанаькъан И., иштта воккхагӏа вола прапорщик Бодак Н.
Тӏема аренашка майрал гойтарах йола майдилг елар Кхоартой И., Суворова цӏерах йола майдилг елар Тиймарзанаькъан И., Йовлой А.
Совгӏаташ дӏаденначул тӏехьагӏа, бӏухой цӏагӏарча нахаца, цар дог тедеш, къамаьл деш хилар вай Мехкада. Хӏаранега ладийгӏа, царна тахан къувлаш мел дараш кхоачашдеш, болх дӏахьо аьнна тӏадиллар Мехкадас.
