Гӏалгӏайчен Кулгалхо вахар, Малсаганаькъан Кӏарцхала цӏерах парк хьаеллача
Малсаганаькъан Кӏарцхала цӏерах йола парк лаьрххӏа хьайийллар, Наьсарен 245 шу дузача дийнахьа. Из дика моттиг бахархошца цхьана екъаш хилар Гӏалгӏай Республикан кулгалхо Келаматанаькъан Махьмуд-Ӏаьла.
Наьсарен, къаман вахаре доккха таьрахь долаш, шоай мехках доаккхал деш бола дукха бахархой гулбелар. Цига дакъа лоацаш вар Паччахьалкхен Думан депутат Бӏарахой Бек-хан, Наьсарен администраце кулгалхо Оздой Руслан, шахьара керттерча маьждига имам Цӏолой Хизар, иштта лоархӏаш бола республикан къоаной. Цӏай долаш вӏашагӏкхийтар кердаяьккхача майдан тӏа моттигера бахархой, халкъа кулгаговзала пхьараш, юкъарлон викалаш.
Къаьстта йола моттиг дӏалаьцар республикан Кулгалхочо Келаматанаькъан Махьмуд-Ӏаьлас нахага даьча къамаьло.
Керттера терко цига йир эггара зӏамагӏа болча хьаьшашта. Царна лаьрхӏа интерактивни доазонаш, тайп-тайпара яхьаш яр цу майдан тӏа йоаржаяь.
Республикан Кулгалхо боккхача безамца хьежаш вар царга. Иштта цунна яйра суртанчий оагӏонаш, цига дукха дар Гӏалгӏайчен ӏалама хозале гойташ дола сурташ, кхерах, аьшках даь балхаш, къаман тӏабувхабу гӏирс, кхыдола товараш.
Махьмуд-Ӏаьлас къамаьл дир говзанчашца, царна юкъе бар лоалахарча республикашкара баьхка хьаьший; цо белгалдир, гӏалгӏай къаман, иштта дерригача Даькъастен къамий культуран оагӏув, исторически тӏехьале лораяра цар малагӏа дакъа юкъедахь.
Малсаганаькъан Кӏарцхала цӏерах парк тоаяь хиларах гонахьара моттиг а сийрдаяьлар, хоза доал деш, лостам лелабеш, дика масалаш гойташ лелаю из. Дукха хиннад цу тайпара хувцамаш Наьсаре. Уж балхаш дар чудоагӏаш йола проекташ кхоачашъеш хиларах, дукха шахьара таронаш хьакхеллай.
Наьсарен 245 шу дузаш, цу тайпара хоза тоадаьча даькъ тӏа вӏашагӏкхета таро хилар вай мехкахой, хьаьший.
