РТРС болхлой 25 шу дизарца даькъалабийцар вай Мехкадас
Российски теле-радио оагӏонца къахьегараш, 25 шу дизарца даькъалабувцаш хилар вай мехкада Келаматанаькъан Махьмуд-ӏаьла. РФ Президента Путин Владимира амарца дӏаболабир цу моттиго ший болх, 2001-ча шера маьцхали бетта 13-ча дийнахьа. Лоархӏамеча балха тӏехьа къахьегаш, хьайоагӏа из тоаба, цу хана денз. РТРС-га гӏолла тахан миллионаш мехкахой керттерча, ерригача Россе, иштта моттигашкарча телепрограммашка, радиоэфирашка кхача йиш йолаш ба, цхьаккха новкъарле йоацаш. Таьрахьашца дувзаденнарий оагӏонга гӏолла болх дӏабахьарах, технолгешцара гӏулакхаш дикка тоадарах ба тахан из аьттув.
«Телевидене, радио хӏама тоадалар лоархӏаме да вай республике а. Хӏаьта вай доалахьарча паччахьалкхен телерадиокомпане истори 1992-ча шера дӏадоладелар. Маьцхали бетта 13-ча дийнахьа хьакхеллар ГТРК «Гӏалгӏайче», оагӏой бетта 20-ча дийнахьа хьалхара эфир хилар. Республика хьаотташ хиннача халача ханашка, бахархой дегашта боккха тоам беш гӏулакх хилар цох. РТРС-га гӏолла федеральни, моттигашкарча программашка хьажа аьттув ба наьха тахан. Цул совгӏа, 88,8 FM «Магас» радиога, 88,4 FM «Онгушт» радиога ладувгӏа аьттув ба мехкахой. «Магас» яха къаман телерадиокомпани лоархӏаме болх дӏахьош я цу оагӏонца», - язду ший телеграм-оагӏонца вай Мехкадас.
Республикан кулгалхочо белгалдир, РТРС тоаба из гӏулакх таханарча ханага хьежжа хьаоттаргдолаш, дикагӏа тоалургдолаш къахьегаш, ший декхараш дизза кхоачашдеш йолга.
Инженерий, бувзамхой, ветераний, технически оагӏонцарча берригача болхлой къахьегамах дӏабодаш ба из болх лерттӏа. Шоай болх цар боаггӏача боараме кхоачашбеш хиларах, гаьна ядача юрташкарча наьха а аьттув ба лоархӏамедараш лораде, мехка фу доалл ха.
