Ше деша ваьгӏача ишколе, «Лоархӏаме къамаьл» дӏахьош хилар вай Мехкада
Ший тайпара дола «Лоархӏаме къамаьл» хилар Шолжа-Шахьарерча № 1 йолча ишколе. Из дӏадихьар вар цхьан хана цига деша ваьгӏа вай мехкада Келаматанаькъан Махьмуд-Ӏаьла. Вахара наькъ тӏа чӏоаггӏа эшаргдарех, терко е езарех дийцар Мехкадас дешархошца.
«Эггара лоархӏамедарех: дезалах, да-нана лархӏарах, наха юкъерча гӏулакхех, дегӏаца хила езача оамалех, сага юххьанца хьахоржача наькъах- хьоахадир цига. Хӏара сага дегӏацара дукхагӏа йола оамалаш къаьстта ишколе чӏоагӏлуш хиларах, кхоанарча вахаре дӏадахьа лаьрхӏар ишколе вагӏача хана хьахоржаш долга, вахарах, ишколах, Даьхенцарча безамах дийцар Мехкадас берашца.
«Царна бӏарахьежаш, се деша иха ха дагаухаш ваьгӏар со. Укхаза чӏоагӏъелар са дегӏацара дукхагӏа йола оамалаш, иштта нахаца гӏулакх леладар, Даьхенцара безам, къахьега лаьрхӏа хилар. Духхьал урокаш тийна ца ӏеш яхь йола саг хила ӏомавора со укхаза. Сона дика дагабоагӏа сай хьехархой, цар вахара наькъ тӏа воаккхаш мел дийцар а. Лоархӏаме дола хӏама хьалхадаьккхар аз берашта цу дийнахьа: атта наькъаш, гӏулакхаш хилац вахаре.
Массадола хӏама къахьегарца, яхь лораярца, нийсача наькъ тӏа хиларца кхоачаш да. Эггара лоархӏамедар - ший са ӏехацадар, даьца - наьнаца лерхӏам болаш, вӏаший гӏо деш, дика гӏулакхаш доаржадарех долаш дӏачакхдалар. Дукха дийцар Даьхенцарча безамах, цун хьалхашкарча декхарех. Даьхенцара лерхӏам яхар сона цунцарча безамах дувца дешаш хинна ӏац, ше дӏахьош дола гӏулакх боаггӏача боараме, бехктокхаме лорадар да из», - яздир вай Мехкадас ший телеграм-оагӏон тӏа. Яьннача ханага хьежжа доаца кӏоарга, лоархӏаме хаттараш телача берех цецваьнна, доаккхал деш вар Мехкада. Кхетаче йистейоалача хана, совгӏат делар республикан кулгалхочоа. Из дар цун класса, дукхабезаш хиннача хьехархой, ишкола сурташца кийчдаь альбом.
