Лоархӏаме гӏишло еча, кхетаче дӏайихьар мехка Кулгалхочо
Гӏалгӏай Республикан кулгалхочо Келаматанаькъан Махьмуд-Ӏаьлас Шолжа кхален Оалкама, Эса яхача хи тӏа хьалъеш йолча моттиге, кхетаче дӏайихьар. Из хоам бир «Сердало» газетага мехка кулгалхочун зарбан болх лелабераша.
«Из гӏишло лоархӏаме я вай республиканна. Гӏалгӏайчен хьалхашка латта эггара чоалханегӏа дола хаттар кхоачашдара эшаш я из. Бахархошта молаш дола дика хий лоаттадара ца хилча яргйоацаш а я.
Гӏалгӏайченгара болча Российски Федераце сенаторашца, Паччахьалкхен Дума депутатаца, вице-премьерашца, из болх лелабеча министерствай, боахамий кулгалхошца, болхлой тоабай викалашца, Ростехнадзора даькъ тӏарча, Росприроднадзора, Роспотребнадзора доакъошца дийцар из проект кхоачашъярах, болх дикал йолаш хьабе безаш хиларах.
Белгалду, бахархошта дикал йолча мелача хица ӏалашо ярах дола дош со цкъа дийца ӏийнавац федеральни боарам тӏа, цу юкъе Россе Президентаца кхетаче йолаш. Россе Кулгалхочо, Паччахьалкхено хьаллоацаш хилар бахьан долаш, федеральни ахчан новкъостал хилар, тахан дика кхоачашдеш а да из гӏулакх», - аьлар Келаматанаькъан Махьмуд-Ӏаьлас.
Цо иштта белгалдир, проекте дакъа лоацаш мел бараш, дикал йолаш, сиха из болх чакхбаккха кийча хила безилга. Из проект чакхъяьнначул тӏехьагӏа, республикан дукхача бахархошта хица ӏалашо лоаттаергья цахаддаш.
Цу юкъе, кулгалхоша белгалду хий дикал лакха йолаш хилар. Цул совгӏа из проект кхоачашъярах республикан экономиканна пайда хул.
«Таханарча дийнахьа балхаш дӏахьош да массехк гӏишлон майдан тӏа. Ахчанцара ӏалашо йолаш я, эшаш йола материалаш, гӏирсаш ийцад, оттаяьча ханал тӏехьа ца бусаш, цига болх дӏахьош ба», - аьлар ГӏР Кулгалхочо.
Проект кхоачашъяра хаттар цо ший теркама юкъе лоаттаду, дукхача шерашка латташ дола, бахархошта хица ӏалашо яра дош ма хулла сихагӏа кхоачашде хьожаш. Из деррига а деш да вай бахархой вахара хьалаш лакхдара.
