Республикерча Юкъарча палата доакъашхошца кхетаче дӏайихьар вай Мехкадас
Республикерча лоархӏамедарех дийцар вай мехкадас Келаматанаькъан Махьмуд-ӏаьлас, республикерча Юкъарча палата доакъашхошца. Юрташкарча, шахьарашкарча вахарах дийцар юристаш, хьехархой, лораш, дийша нах гулбеннача вӏашагӏкхетаре. Хьакимаша шоай моттигера болх малагӏча боараме дӏахьош ба, наькъаш, вахара гӏишлош хьалъеш дола гӏулакх мишта дӏадодаш да дийцар цига. Къаьстта терко еш дийцар цига кагирхой шоай ӏадаташ, хьабаьнна моттиг лоархӏаш, боккхагӏбарашца лерхӏам болаш, дика гӏулакхаш доаржаде, къахьега кийча болаш ураоттабарах.
«Сона эггара лоархӏамегӏдар – наьха бокъонаш лораяр, моллагӏа болх лерттӏа чакхбаьккха хилар. Цудухьа моллагӏа хӏама, духхьала къамаьлашца дийца ца ӏеш, беркате, дика чаккхе йолаш хила деза. Мехка йиъ муниципальни кхале, 36 юрт я. Наьха хьашташ, вахарера кхоачамбоацараш довзаш хила деза. Муниципальни хьакимашта ха деза хӏара моттигера хьал, бахархошца массахана бувзаме болаш хила беза. Дӏахо кхы а низ эшаш хилча, гаьна ца а доалийташ, эггара хьалха кхален, тӏаккха республикански оагӏонца доаржадаь меттадоаладе деза деррига. Кабинетера кабинете телаш ца а лелийташ, моллагӏа хӏама боаггӏача боараме тахка, тӏаккха бокъонгахьа даккха деза – из да лоархӏаме! Муниципалитетий кулгалхой бокъонаш йовзаш, гаьна ца а доалийташ цу моттиге хӏама тоадара болх дика кхетабеш хила беза. Муниципальни хьакимаш ба аьнна доацаш, шоай декхараш дизза кхоачашдеш, наьха вахарера гӏулакхаш тоадара тӏехьа къахьегаш хила беза хӏара денна», - язду вай мехкадас ший телеграм-оагӏон тӏа.
Дикка терко йир кхетаче Юкъарча палата декхарашта, хӏана аьлча бахархошца массахана бувзаме хила аьттув ба цар. «Палата болх лертӏа хьаоттабаь хила беза – наха яхачун терко еш, моллагӏча халача гӏулакха бахьанаш тохкаш, де дезар хьалхадоаккхаш, тӏаккха из деррига боаггӏача боараме кхоачашдара тӏахьожам беш. Болх иштта дӏахьош хилча; бахархошта, хьакимашта юкъе бувзам хургба; цул совгӏа, гӏулакх тешаме хургда», - белгалдир вай Мехкадас.
Цӏенхаштта дийцар республиканна хьатӏадоагӏача хӏаман оагӏонах. Мехка йоалацара гӏулакх, иштта экономикан хьал лертӏа хиларца хоттаденна да из. Республикан чухьнахьа хьатӏадоагӏачунга хьежжа хургда хӏама тоадара гӏулакхаш а. Цунга хьежжа йоккха терко е езаш болх ба из. Наха юкъе массахана барт хургбола хӏамаш доаржадеш, къаман тхьоврача шерашка денз даьша хьадахьа ӏадаташ лорадеш, нах бекъа ца гӏерташ хилар да лоархӏаме. Ди бовзар кхетам хиларца; хозача, беркатеча гӏулакхашца; бехктокхаме, вӏаший лерхӏам болаш хиларца латташ да. Тахан республике болх бе керда моттигаш я, цунга хьежжа кагирхой цу оагӏонца дувзаденнараш а хувцаденнад. Мехкадас белгалдир, гӏишлонхо, ахархо, пхьар – моллагӏа вале а, хьаьнала, бехктокхаме къахьегаш хилча; цхьаккха балхах эхь хеташ, юхаозалуш хила йиш йоацилга. Къахьегаро дезал кхоаб, дукха хӏама довзийт, саг дикка гаьнавоаккх. Зӏамига долча хана денз, бераца чӏоагӏде дезаш, массахана хьалхадаха дезаш хӏама да из – къахьегаш, ший низаца цхьацца хӏама хьадеш хилар. Цу дерриганена керттера моттиг, кхуврч – из цӏа да. Цигара долалу деррига а: даьца, наьнаца лерхӏам хилар, наха юкъе бехктокхаме, къахьега ловш, доккхача дикашка кхача хьожаш хилар.
Вай респаублике хӏама тоадалар хьакимаш дика хиларца, дезала моттиг боаггӏача боараме лораеш, чӏоагӏа хиларца, хьинар долаш, дикаш доаржаде ловш хиларца дувзаденна долга теркалдир Мехкадас. Юкъарча палато къахьега деза, из деррига боаггӏача боараме хилийтара тӏехьа.
