Психоневрологически интернат хьалъеш дӏахьоча балхага хьежар вай Мехкада
Психоневрологически оала интернат хьалъеш, боккха болх ба Магӏалбика цхьоалагӏча кхале дӏахьош. Россе къахьегама гӏулакхех йолча министерствос хьаллоацаш, дӏахьош ба из болх. 3,2 гектар доазон тӏа хьалъеш йолча интернате 200 унахочоа моттигаш хургья. 1, 5 миллиард сом совгӏа ахча да цу гӏулакха хьакъоастадаьр. 2027-ча шера деррига балхаш чакхдаха лерхӏ цига. Вай мехкада Келаматанаькъан Махьмуд-Ӏаьла цига ваха, болх малагӏча боараме дӏахьош ба тохкаш хилар.
«Хӏара моттигера болх мишта дӏахьош латт хьожаш хилар мехкада. Хьагучох, юххьанца йиллача ханал хьалхагӏа кийча хила мегаш я интернат. Мехка кулгалхочо хьалхадаьккхар; болх лертӏа, массадола хӏама теркалдеш, дӏабихьа хила безилга. Къаьстта хьоахадир цига хиш цӏендеш йолча моттигах. Унахошта паргӏатта ӏе йиш йолаш моттиг хила еза из; бахаш, дарба деш йола корпусаш йолаш, хӏама даа моттиг, лувчаш, хӏамаш ютташ йола моттиг; арабаьнна коа гобоаккхаш лела къоастадаь доазув долаш», - дийцар «Сердалога» мехкарча паччахьалкхено.
Дола-Коарча тахан болх беш йолча интернате моттигаш тоъаш цахиларах, хьалъеш я керда гӏишло. 1940-ча шера хьалъяьча цу гӏишло чу, 50 сага мара моттигаш яц, бакъда карарча хана ӏеш 70 саг ва цу чу.
Керда интернат хьаелларо дикка аттачахьа доаккхаргда из хьал. Белгалде деза, шоай аргӏа кхачарга хьежараш тахан 127 саг волга.
