Хьажол де болхараш накъабаьхар вай Мехкадас
Россе турпала Осканаькъан Сулумбика цӏи лелаеча «Магас» аэропортера, хьажол де болхараш езача моттигашка бугаш, фецара кема арадаьлар. Бусалба сага паразех цхьа параз кхоачашде болхараш накъабаха цига вена хилар вай мехкада Келаматанаькъан Махьмуд-Ӏаьла.
«Дала тӏадиллача тайпара, боаггӏача боараме шоай хьажол тӏерадаьккха; могаш-маьрша болаш, паргӏатабаьнна цӏенах кхета даькъалабийцар уж Мехкадас. Дала къоабалдаь дӏаэцалда цар ӏибадат, дуӏаш, дика гӏулакхаш, шоай гӏулакх хало йоацаш чакхдаккха низ лулба царна Дала», - яздир вай Мехкадас ший телеграм-оагӏон тӏа.
Вай мехкарча аэропортера хьажол де болхараш ийца, арадоалараш 12 фецара кема да. 8 рейсаца вай мехкахой бигар, хӏаьта 4 рейс Россе кхыча моттигашкарча бусалба наха лаьрхӏа яр. Фецара кемаш арадалар боаггӏача боараме дӏадихьар; лакха терко, тӏахьожам беш. Хӏара тоабанца хьалхалатташ дийша нах, лораш ба.
