Мехкада: наркотикаш йоаржаераш, нах боаберашца нийсбе йиш я
Республикан Парламенте къамаьл деш, ГӏалгӀайчен кулгалхочо Келаматанаькъан Махьмуд-Ӏаьлас белгалдир, чӀоагӀа а цхьаккха оагӀорахьа къахетам боацаш а накорманена духьалъотта везаш хиларах. Из хоам «Сердало» газетага бир мехка кулгалхочун зарбан болх лелабераша.
Мехкадас хьалхадаьккхар, дӀадахача шера, ГӀР бокъонаш лораяра органаша 23 кг наркотикаш хьаяьха хилар. Сага кхетам, цун дегӀ хӏалакдара эзар боарам ба из. Наркотикаш йоаржаеш болча наха кхетаде деза, цар наьха вахар дохаделга, уж ба нах боабераш. Наркотикаш иштта сиха вувц саг, цар кӀезиг- кӀезига дӀахьу сага могашал, ираз доаду, дезал бохабу, берий хургдар дӀахьу. Цу воча гӀулакха боарам бац, хӀара цӀагӀа да йиш йолаш да из. Из закона духьалара зулам да, цхьаккха тайпара эхь а, эздел а, нахацара лерхӀам а болаш нах бац из леладераш», - аьлар Махьмуд- Ӏаьлас.
Цо тӀахьийхар республикан бахархой массайолча оагӀорахьара юкъарлонцара уж дӏахоадабара. Наьха балан тӀа, ший таро е гӀерташ вар, лерттӀа законаш лорадеча нахаца бувзам болаш хила йиш яц. ГӏалгӀай къаман Ӏадатий мах бараш - сага вахар лорадар, шийна уллуврча сагах бехктокхаме хилар - из да котдала дезар.
ГӀР Кулгалхочо аьлар, цу гӀулакха тӀахьожам лоаттабеш болча болхлоша из гӏулакх чӀоагӀде деза, полицена новкъостал де деза, кагирхошта терко лоаттае еза.
Паччахьалкхенца цхьана еррига юкъарло а хила еза, цу зулама духьалара болх дӀахьош. Республикан хургдар лорадара, къам могаш хилара, Махьмуд-Ӏаьлас яхачох, цу даькъ тӀа доккха дакъа дӀалоацаш хила беза даьй-ноаной, хьехархой, хьехамчаш, дина викалаш.
