КИФ-2026 йолаш, «Губернаторцара къамаьл» яхача сессе дакъа лоацаш хилар вай Мехкада
Кавказски инвестиционни кхетаче дӏайихьар «Губернаторцара къамаьл: Кавказагахьара лостам» яха лоархӏаме сесси. Из хьайийллар вай мехкадас Келаматанаькъан Махьмуд-Ӏаьлас. «Сердалога» из хоам бир мехкадаь зарбан болх лелабераша.
«Къилбаседа Кавказа моттигашта юкъера цхьацца пайдане хургдраш дӏа-хьа эца, къамаьл де аьттув бола моттиг яр из, дега тоам беш дар вай республика цу юкъе лоархӏаме дакъа дӏалоацаш хилар. Цу сессе оаха дийцар хӏама тоадарцарча керттердарех, кердадарех. Дог тийшша оалалу сога Къилбаседа Кавказ хӏара денца чӏоагӏагӏа инвесторий терко тӏаозаш йолга, хӏаьта вай республика къаьстта моттиг дӏалоацаш я укхаза», - белгалдир республикан кулгалхочо Келаматанаькъан Махьмуд-Ӏаьлас. Мехкадас хьоахадир вахара-экономически хьалаца, республикерча промышленностаца дувзаденнараш дикка тоалуш доагӏилга, доккхий хувцамаш хиннилга.
«Къаьстта терко йир сессе экологена. Белгалде лов, 2026-гӏа шу Гӏалгӏайче аз экологен шу да аьнна къоастадаьлга. Хӏаьта из ший бух болаш да… Йоккхий проекташ кхоачашъеш да тхо тахан, гонахьарча ӏалама цар новкъарле, зе дергдоацаш терко лоаттаю оаха», - аьлар вай Мехкадас. Къилбаседа Кавказа юккъе улл республика, цунга хьежжа тайп-тайпара беркате хургйола проекташ кхолла кийча да тхо. Цул совгӏа, инвесторашта, республикан доазон тӏа къахьега ловш барашта, цхьаккха бюрократизм йоацаш дика аьттув лу. Къахьегама оагӏонцара бувзам лелабе, пайдане хургдола хӏама доаржаде ловчар оагӏув хьаллаца, царца гӏулакх леладе кийча ба мехка. Тахан республике дикка даржаш да ӏT-оагӏонца дувзаденнараш, шоай мехка къахьегаргдола къона говзанчаш кийчбеш, арахецаш ба тахан.
«Губернаторцара къамаьл» яхача сессех, Къилбаседа Кавказа моттигашта юкъера лоархӏамеча бувзама хӏама чӏоагӏдара тӏехьа баьккха гӏа хилар», - аьлар вай мехкадас.
