Моттигашта доал ду гӏулакхаш тӏара нах даькъалабийцар вай Мехкадас
Моттигашка доал ду кулгалхой, депутаташ, ОМС болхлой даькъалабийцар вай мехкадас Келаматанаькъан Махьмуд-ӏаьлас. Из хоам «Сердалога» бир мехкадаь зарбан болх лелабераша.
«Муниципальни оагӏонца къахьегар хӏара дийнахьа фийла, наха уллув хила везаш бехктокхаме болх ба. Эггара хьалха шоана довз наьха вахарера кхоачамбоацараш, моллагӏа хӏама нийсделча шоана тӏабоагӏа бахархой. Тахан вай республике 9 муниципальни моттиг я. Ерригача муниципалитетий кулгалхой «Зӏамига Даьхе - Россе низ» яхача ӏӏӏ Ерригача Россе муниципальни кхетаче дакъа лоацаш ба тахан.
Цига дакъа лоацаш я РФ Федеральни Гуллама Федерацен Кхела кулгал деш йола Матвиенко Валентина, РФ Кхерамзлен Кхела кулгалхо Медведев Дмитрий, РФ Президента Администраце кулгалхочун хьалхара гӏонча Кириенко Сергей. Цу наха дакъа лоацаш хиларо хьагойт вайна, из кхетаче мел лоархӏаме я», - белгалдир вай мехкадас Келаматанаькъан Махьмуд-ӏаьлас. Республикан кулгалхочо иштта теркалдир, тахан ОМС оагӏонца кхоачашдераш доккхий гӏулакхаш, лоархӏаме декхараш долга.
Цу юкъе да вахара, экономически оагӏонца дувзаденнараш, иштта бахархой хьал меттадоаладе дезараш. Уж деррига гӏулакхаш тахан РФ Президента чӏоагӏонца йоаржаяьча къаман проекташка гӏолла кхоачашде аьттув боал вай. Иштта Мехкадас белгалдир тахан вай Президент Путин Владимир моттигерча хьакимий балха терко лоаттаеш, къоастадаь латта лоархӏаме дола декхараш кхоачашдара тӏехьа гӏо деш хилар.
«Тахан вайна хьалхашка керда декхараш латт - муниципалитетий экономика чӏоагӏъяр; шахьарий, юртий хьал тоадар; ваха, болх бе, бераш кхеде эггара чӏоагӏагӏа эшаш дарашта терко лоаттаяр, наьха хьал аттачахьа доаккхаш. Шоай гӏулакх боаггӏача боараме, бехктокхаме, лакхача говзалца оаш дӏахьош хилча, доккхача толамашка вай кхоачаргхиларх дог тийша ва со», - белгалду вай Мехкадас ший къамаьла юкъе.
