«Даьхен лорабой» яхача ганза викалца, кхетаче хилар вай мехкадаь
«Даьхен лорабой» яхача Паччахьалкхен ганза моттигашкарча балхах йолча Департамента кулгалхочунца Фролова Любайца кхетаче дӏайихьар вай мехкадас Келаматанаькъан Махьмуд-Ӏаьлас. Вӏашагӏкхетаре дийцар мехкарча филиала балхах, СВО ветеранашта, цар дезалашта гӏо дара тӏехьа кхоачашдаьрех. Цох яздир вай мехкадас ший Телеграм- оагӏон тӏа. Келаматанаькъан Махьмуд-ӏаьлас кхетаче белгалдир, цу оагӏонцара болх республике боаггӏача боараме ше-ший аргӏагӏа дӏахьош болга.
Филиала, мехкарча хьакимашта юкъе бувзам хиларо кхоачамбоацараш меттадоаладе, хӏара дезале эшар фуд тахка аьттув лу. Фролова Любас лакха мах оттабир вай мехкарча филиала дӏабихьача балха. Къаьстта терко йир цо лорий дарба лоаттадара, санаторе салаӏа аьттув хилийтара, ветераний, иштта цар цӏагӏарча наьха могашал меттайоалаяра тӏехьа программаш йоаржаяра гӏулакха. Цо белгалдаьчох, Гӏалгӏай Республике СВО доакъашхой хьашташ кхоачашдара, цар могашал меттайоалаяра тӏехьа лакха терко лоаттаю.
Даьхен гӏулакха арабаьннарашка, цар цӏагӏарча нахага хьажар, тахан вай республике керттерча декхарех да. Къаьстта йоккха терко лоаттаю заӏапхой болча ветеранашта. Дарба лоаттадарал совгӏа, вахарера гӏулакхаш кхоачашде цар аьттув хургболаш къахьег тахан. СВО доакъашхошта, цар цӏагӏарча наха шоай хьашташ кхоачашде, вахарера цхьацца кхоачамбоацараш меттадоаладе аттагӏа хургдолаш лаьрхӏа болх ба мехка дӏахьош.
Иштта къахьег ветеранаш балха оттабеш, вахаре цхьацца йолча моттиге уж дӏачӏоагӏбалийта хьожаш. Мехкарча кулгалхоша лакха терко лоаттаеш, тӏахьожам беш дӏахьош болх ба из. Республике тахан доаржадеш, гӏо деш дола боламаш да; вахарера, юридически оагӏонцара гӏулакхаш кхоачашдара тӏехьа новкъостал ду. Мехкарча министерствошца, хьакимашца бувзам болаш, дӏахьош болх ба из. Иштта цхьана дӏахьоча балхаца дикагӏа аьттув боал цхьаккха хӏама юкъе ца дита, хӏара дезале малагӏа тайпара кхоачамбоацараш латт тахка.
