ЛНР Старобельски куран бахархой оагӏув хьаллаца кийча хилар белгалдир вай Мехкадас
Лугански Къаман Республикерча Старобельски оалача муниципальни моттиге хатар хиннад. Саг чувоацаш гӏетташ долча гӏирсашка гӏолла, шахьара моттигаш чӏоагӏа йохаяьй, наха доккха зулам даьд. Къаьстта чӏоагӏа йохаяьй дешара корпус, хьехархой университета чуйоагӏаш йолча Старобельски колледжа общежити. Бийсан из хатар хулача хана ощежите 14 шерагара 18 шерга кхаччалца вола 86 студент хиннав. Нийсса ах гӏишло йохаяьй.
«Тахан цу наьха оагӏув хьаллоацаш, ЛНР бахархошца цар гӏайгӏа екъаш ба мехка. Машаре бахаш болча наха зулам деш хилча, юстара хила вӏаштӏехьа дац. Эшаш дола новкъостал де кийча ба вай республике. ЛНР кулгал деча Пасечник Леонида, Старобельски муниципальни моттига хьалха латтача Чернев Владимира оагӏув хьаллаца кийча да вай тахан. Иштта лозадаьча берашта, цар дезалашта, халача хьале эттача бахархошта могаш дола гӏо дергда. Машаре бахача наха, берашта духьала зулам дар йоккха къизал я», - аьлар вай мехкадас Келаматанаькъан Махьмуд-Ӏаьлас.
Машаре бахаш болча наьха хӏама толхаде, шахьара моттигаш йохае, аьнна, бийсан даь доккха зулам да из. 18 шерга кхачанза дола бераш тхьайса даьдача общежите, дешара корпусе саг чувоацаш гӏетташ дола гӏирсаш чухецаро халача хьале оттадаьд адам. Низ дӏа ма кхоачча цар гӏулакхага хьожаш хургда вай.
