Гӏалгӏайчен Миннаца кулгалхочо дакъа лоац Симферополе дӏахьоча медиакхетаче
Гӏалгӏайчен арахьарча бувзама, къаман политикан, зарбан, хоамий Министерствон кулгалхо Мизенаькъан Руслан дакъа лоацаш ва «Къамашта юкъера барт чӏоагӏбара практика» яхача ӏV-ча мехкашта юкъерча кхетаче. Из дӏахьош я Симферополе. Цу кхетачене гулбелар медиа даькъ тӏара болхлой, паччахьалкхен доакъой викалаш, кхелахой, иштта Россе тайп-тайпарча моттигашкара цхьанкхетараш.
«Цига дийцар тахан латтача хоамий хьалашка къамашта юкъера бувзам, барт чӏоагӏбеш, шоайла культураш лоархӏаш, нийса хоам нахага кхоачийташ хилар мел лоархӏаме да. Къаман СМИ лоархӏаме декхар кхоачашдеш я: цар лорабу мотт, ӏадаташ, цар дувц Россе къамий вахарах, шоайла лерхӏам хиларах, цар духьале ю вай юкъарло йохае гӏертача наха», - аьлар Мизенаькъан Руслана «Сердало» газетага.
Министра ше тешаш ва аьлар, профессиональни, нийсхо йола хоам тахан массанахьа дӏакхоачаш хиларо, медиа юкъарлонаш из болх дика дӏахьош хиларо таро лургья, аьнна; лакха боарам бола хоамий материалаш араяха. Из ший аргӏагӏа накъадоалаш да наха юкъера барт чӏоагӏбара, лоалахошца барт болаш, вахара мах бараш лорадара.
